Эрхэм хүндэт оюутан, залуучууд аа!

Улаанбаатар дээд сургууль нь Монголын нийгэм зах зээлийн эдийн засагт шилжих шилжилтийн эхэн үед гадаадын хөрөнгө оруулалттай байгуулагдсан дээд боловсролын анхны байгууллага бөгөөд тус сургууль нь "хамгийн хурдацтай хөгжиж буй", "сургалтын чанар сайн" зэргээрээ өнөөдөр хүн бүрийн танил болжээ.

Манай Улаанбаатар дээд сургуульд болон харьяа бага, дунд сургуульд элсэхийг хүссэн хүн бүрийг элсүүлэн суралцуулах боломжгүй боловч өрсөлдөөний үр дүнд өндөр мэдлэг, чадвартай охид, хөвгүүд ирээдүйнхээ төлөө манай сургуулийг сонгодог нь тус сургуулийн үнэ цэнийг харуулж байна.

Одоо бидэнд Монголын нэр хүндтэй хувийн хэвшлийн дээд сургууль хэмээх нэрээ хадгалж, Монгол улсын хөгжилд хувь нэмэр оруулах, улмаар "Бахархмаар Улаанбаатар их сургууль" болох зорилт тулгарч байна.

Энэ хугацаанд элсэн суралцагсад, эрдэмтэн багш нарын тоо өсөн нэмэгдэж, сургуулийн бүтэц бүрэлдэхүүн, гадаад харилцаа өргөжин тэлж, өнөөгийн байдлаар 20 шахам мэргэжлээр боловсон хүчин бэлтгэж, улмаар дипломын, бакалаврын, магистрын шаталсан сургалтыг амжилттай явуулж, сургалт судалгааны ажлын чанар сайжирч, сургууль маань нийгмийн хөгжилтэй хөл нийлүүлэн алхаж байгааг та бүхэнд танилцуулахад сэтгэл хангалуун байна.

Манай сургууль юуны өмнө оюутан залуучуудын суралцах орчинг сайжруулах үүднээс хичээлийн байрны өргөтгөл, оюутны дотуур байрыг шинээр барьж, ашиглалтанд өгч,

сургуулиа иж бүрэн компьютержүүлж, шинээр хэд хэдэн компьютерийн лаборатори, интернет мэдээллийн болон интернет сургалтын төвүүд, хими, физик, анатомийн лабораториудыг байгуулж, хот, хөдөөд байрладаг дадлагын баазуудаа өргөтгөлөө.

Шинжлэх ухаан, технологийн хөгжил шинэчлэлийг дагаад сургалтын агуулга, зохион байгуулалтандаа өөрчлөлт хийж, сургалтыг уян хатан хувилбартай, оюутны сонгох боломжийг хангах чиглэлээр сургалтын төлөвлөгөө, стандарт хөтөлбөрөө шинэчилж байна. Энэ бүхэнтэй та бүхэн энэхүү номноос танилцах болно.

"Боловсрол амьд бол Улс орон амьд" гэсэн зарчмаар оюутан сурагч, тэдний эцэг эхийг эрдэм мэдлэгт, харин багш сурган хүмүүжүүлэгчид та бүхнийг боловсролын үйлчилгээний чанарыг дээшлүүлэхийн төлөө нэгэн сэтгэлээр чармайн ажиллахыг уриалж байна.

Захирал, доктор, профессор Юн Сүнжээ