Танилцуулга

Хаяг байршил: 

Баянзүрх Дүүрэг 25-р хороо, Намянжугийн гудамж,
Улаанбаатар 210644, Ш/х-658
Утас: 462028, 462029 Факс: 462040
 
 

Танилцуулга

          Олон улсын Улаанбаатарын их сургуулийг 1995 онд “Улаанбаатар коллеж” нэртэйгээр байгуулсан юм. Хөгжлийн явцдаа 2002 онд “Улаанбаатар дээд сургууль”, 2012 онд “Улаанбаатар их сургууль”, 2014 онд  “Юу Би Юу их сургууль”, 2015 онд “Олон улсын Улаанбаатарын их сургууль” болон хөгжлөө.

          Одоо ОУУБИС нь Хүмүүнлэг, Эдийн засаг, Эрх зүй, Сувилахуй, Хөдөө аж ахуй, Инженерийн болон Суурь боловсролын 6 салбар, 13 тэнхим, Төгсөлтийн дараах сургууль гэсэн бүтэцтэйгээр бакалавр, магистрантур, докторантурын сургалтын үйл ажиллагаа явуулж байна.

          Тус сургууль нь боловсролын үйлчилгээ үзүүлсэн өдгөө 23 жилийн хугацаандаа докторын 4, магистрын 644, бакалаврын 6035 оюутан төгсгөсөн бахдам амжилт гаргалаа.

          Тус сургууль нь “Улаанбаатар коллеж” байхдаа Дээд боловсролын магадлан итгэмжлэх Үндэсний зөвлөлийн хуралдаанаар 5 жилээр, “Улаанбаатар дээд сургууль” байхдаа дахин орж 10 жилийн хугацаатай магадлан итгэмжлэгдсэн бөгөөд одоо гурав дахь удаагаа орж байна.

          ОУУБИС нь гадаадын хөрөнгө оруулалттай хувийн хэвшлийн томоохон их сургууль юм. Солонгосын хөрөнгө оруулалттай манай сургууль нь “Дэлхийд гарах гарц” уриатайгаар монгол оюутан, залууст олон улсын түвшний боловсрол эзэмшүүлэнх гүүр нь болж ажиллаж байгаа чадварлаг хамт олон юм.

          ОУУБИС-д  эдүгээ 200 гаруй эрдэмтэн багш, судлаач, ажилтан, ажилчид ажиллаж байгаа ба нийт багш нарын 40 орчим хувь нь эрдмийн зэрэг цолтой боллоо. Мөн гадаадын 17 эрдэмтэн багш, судлаач, мэргэжилтэн ажиллаж байна.

          Тус сургууль нь АНУ, БНСУ, ОХУ, БНХАУ зэрэг орны 97 их, дээд сургууль, эрдэм шинжилгээний төвтэй хамтын ажиллагааны гэрээтэй ажиллаж, байгаа ба богино хугацааны тусгай хөтөлбөр, 6 сараас 1 жилийн хугацаатай оюутан солилцооны хөтөлбөр, 2+2 хөтөлбөр, магистрантур, докторантурт тэтгэлэгтэй суралцах хөтөлбөрийг амжилттай хэрэгжүүлж байна. Гадаад хамтын ажиллагааны хүрээнд жил бүр сайн дурын багуудыг БНСУ-аас хүлээн авч өвөл, зуны тусгай сургалтуудад хамруулж байна.

          ОУУБИС нь эдүгээ бакалавр, магистр, докторын онол, практикийн сургалт явуулах зориулалттай хичээлийн 1, 2, 3 дугаар  байр, спорт заал, соёлын төв, дадлага, Жигжид дэх сургалтын зуны бааз, Батсүмбэр дэх дадлагын бааз болон Улаанбаатар цэцэрлэг, Улаанбаатар бүрэн дунд сургууль гэсэн цогцолбор бүрэлдэхүүнтэйгээр сургуулийн өмнөх боловсролоос докторын түвиш хүртэлх боловсролын үйлчилгээг үзүүлж байна. Мөн оюутнуудад иж бүрэн, тохилог оюутны байранд орон нутгийн оюутнуудыг хүлээн авч байна.

          Манай сургууль нь оюутанд олгодог сургалтын төлбөрийн тэтгэлгийн хэмжээгээр тэргүүлэгч сургууль юм. Суралцагчдын 35 хувь нь дараах төрлийн тэтгэлэгт хамрагддаг. Үүнд: Удирдах зөвлөлийн нэрэмжит тэтгэлэл, Ерөнхий захирлын нэрэмжит тэтгэлэг, Багш ажилчдын нэрэмжит тэтгэлэг, Голч дүнгийн тэтгэлэг, Шинэ элсэгчдэд зориулсан тэтгэлэг, Нийгмийн үйлчлэлийн нэрэмжит тэтгэлэг, Нийгмийн халамжийн тэтгэлэг, Багш ажилчдын хүүхдийн тэтгэлэг, Спортын тэтгэлэг, Урлагын тэтгэлэг, Цагийн ажлын тэтгэлэг, Оюутны зөвлөлийн тэтгэлэг, Байгууллагын нэрэмжит тэтгэлэг, Хувь хүний нэрэмжит тэтгэлэг зэрэг гэх мэт.

         2010-2017 оны байдлаар 1 тэрбум 23 сая 755 мянган төгрөгний тэтгэлэгийг олгосноос 2016-2017 оны хичээлийн жилд 331 оюутанд 135,962,500 төгрөгийн тэтгэлэг олгосон байна.

          Оюутнуудыг хамарсан спорт, урлагийн наадам, сар бүрийн аяныг зохион байгуулахаас гадна ширээний  теннис, морин хуур, гитар, англи, солонгос хэлний дугуйлан, сагсан бөмбөг, хөл бөмбөг, гар бөмбөгийн секц болон мэргэжлийн чиг баримжаа олгох олон төрлийн дугуйланг мэргэлжийн багш нар хариуцан хичээлүүлж байна