Ерөнхий захирлын мэндчилгээ

 

Сайн байцгаана уу?

1990 онд Монгол-Солонгосын найрамдлын харьцаа өргөжиж, иргэд хоёр улсын хооронд чөлөөтэй зорчих болсон тэр үед хэдэн солонгос хүн Монгол улсад хөл тавьжээ. Тэд монголчуудын боловсролд  хөрөнгө оруулахаар шийдэж, улмаар өнөөгийн Олон улсын Улаанбаатарын их сургуулийн шавыг тавьсан билээ.

Боловсрол нь тухайн улс орон, ард түмний ирээдүйг тодорхойлох гол хүчин зүйл болдог ажээ. Учир нь тухайн улсын ирээдүй нь нийгмийн салбар бүрийг чадварлагаар удирдах, өндөр боловсролтой сэхээтнүүдийн гарт байдаг юм. Энэ ч утгаараа даяаршлын үеийн нийгмийн хөгжил нь биднээс олон улсын түвшний мэдлэг боловсролтой, удирдан манлайлах чадвартай мэргэжилтэн бэлтгэхийг шаардаж байна.

Тиймээс манай сургуулийнхан  энэхүү шаардлагад нийцэхүйц удирдагчид бэлтгэхийг зорилгоо болгож,  итгэл, хайр, найдварыг зүрх сэтгэлийн уриа болгон, ажилласаар ирсэн билээ.

Өнгөрсөн хугацаанд сургууль маань эцэг эхчүүдийн хүүхдээ сургах гэсэн чин эрмэлзлэл, оюутнуудын идэвх чармайлт, багш нарын шавиа гэсэн сэтгэл, эрдэм ухаан, ажилтан ажилчдын хөдөлмөрч зүтгэлийн үрээр хөгжин цэцэглэсээр, эдүгээ 24 чиглэлээр мэргэжил эзэмшүүлдэг, олон улсын статустай сургууль болон өргөжлөө.

Бид энэ жил ерөнхий боловсролын ахлах сургуулийг төгсөж буй сурагчдад ажил мэргэжлээ сонгоход нь туслахаар сургуулийнхаа салбар, тэнхим бүрийн үйл ажиллагаа, тэдний бэлтгэдэг мэргэжлийн онцлогуудыг харуулсан танилцуулга бэлтгэлээ.

Сурагчид та нарын сонголт ирээдүйг тань чиглүүлэх учраас ухаалаг шийдвэр гаргахыг хүсье.

Та бүгдийн эрдмийн алтан шар зам дардан агаад холч, оюуны ганзага дүүрэн байхын ерөөл өргөе.

 

Ерөнхий захирал

доктор, профессор Нам Ги Ён